Psa 21 | MNA | STEP | Mboe ki Dabit O Yooba, nu pombolmbol king pa itum mburom, tana ni leleene ambai kat pu. Pa nu uluuli pa malmal ma iliplip pa ka koi bizin. Tanata menmeeni biibi kat.

aMbo 2:1, 37:7; Mk 14:1

Psalms 21

Mboe 21

Zin Israel tipakur Anutu pa ulaaŋa ta ni ikam pa king kizin

Mboe ki Dabit

1 O Yooba, nu pombolmbol king pa itum mburom, tana ni leleene ambai kat pu.
Pa nu uluuli pa malmal ma iliplip pa ka koi bizin. Tanata menmeeni biibi kat.
2 Koroŋ ta ni leleene pa, ta kam pini kek.
Koroŋ ta ni iwi u pa na, nu ruutu pini som.
3 Nu mar kini mi pomboli, mi pomoozi pa koroŋ ambaimbaiŋan boozomen.
Mi ur mogar milmilŋana isala uteene. Mogar tana, tiurpe pa pat gol ta iŋgeeze kat.
4 Ni iwi u be uuli ma imbot ambai, mi nu leŋ la kalŋaana.
Tana mbotŋana kini ko iseeŋge iseeŋge ma ila.
5 Nu uuli ma ilip pa malmal,
tana ni zaana biibi mi mburaana biibi, mi tomtom tiwidit uruunu.
6 Kampeŋana ku ko imbotmbot se kini ma alok.
Mi nu mbotmbot raami. Tana ni leleene ambai kat.
7 King, ni ipase pa Yooba. Tana kosa sa ko irao be ikami ma itop na som.
Pa Anutu kor kana kat itoto sua kini mbukŋana mi iurur leleene pini totomen.

8 O king, nomom ko ikis kom koi bizin ta boozomen.
Zin wal ta tiurur koi pu na, nomom woono ko irokiskis zin.
9 Nu sombe swe mburom, nako pasaana zin kembei ta you.
Pa Yooba itunu ko keteene malmal pizin mi ipambiriizi zin. Ko ikam ma you ikan zin.
10 Mi lutun bizin ta boozomen tomini, nu ko kas zin ma timap lup.
Tana kaimer popoŋana kizin sa ko imbot toono mini som.
11 Ŋonoono, zin tipaata kom, mi timbuk kom kiizi be tipasaanu.
Tamen ŋgar kizin ko iur ŋonoono som. ^a
12 Pa tire peene lutuunu ta sara la matan na,
tanata timoto mi tiko ma tila len.

13 Yooba, maŋga mi swe mburom!
Mi niam ko ambo mboe mi amwit urum. Pa nu mburom keskeezeŋom.